प्रबंध पहिला -
बहुसाल कल्पांत लोकांसी आला।
महर्गे बहु धाडी केली जनांला।
कितीयेक मृत्युसी ते योग्य जालें।
कितीयेक ते देश त्यागुनी गेले।।१।।
कितीयेक ग्रामे चि ते वोस जाली।
पिके सर्व धान्यें च नाना बुडाली।
कितीयेक धाडिवरी धाडी येती।
द्वया सैन्यकाचेनी संव्हार होती।।२।।
कितीयेक ते मेघ ही मंद जालें।
अनावृष्टी स्थळोस्थळी लोक मेले।
कितीयेक अन्नाविसी भ्रष्ट जालें।
कितीयेक लोकीं जळीं प्राण दिल्हे।।३।।
कितीयेक ते तांब्रबंदी च गेले।
कितीयेक माऱ्हाष्टबंदी निमाले।
कितीयेक ते छंद ना बंद नाही।
कितीयेक बेबंद ते ठाईं ठाईं।।४।।
कितीयेक ते धान्य लुटोनि नेती।
कितीयेक ते पेंव खाणोनि नेती।
कितीयेक ते पुरीले अर्थ नेती।
किती पुरीली सर्व पात्रेची नेती।।५।।
किती पंथ देशात ते नासले हो।
कितीयेक पंथात ते मारिले हो।
कितीयेक पंथात ते लुटीले हो।
किती दांडगी ते बहु कुटीले हो।।६।।
कितीयेक ते घ्राणकर्णेचि घेती।
किती उत्तमा त्या स्त्रिया भ्रष्टविती।
किती मोट बांधोनी ते बुडविती।
पिछोडेची बांधोनी हीरोनि नेती।।७।।
किती पोट फाडुनी ते मारीताती।
वृथा चोर अर्थाविसी प्राण घेती।
कितीयेक सौदागरा बुडविती।
कितीयेक ते काफिले लुटिताती।।८।।
किती गुज्रिणी ब्राह्मणी भ्रष्टविल्या।
किती शांमुखी जाहाजी फाकवील्या।
कितीयेक देशांतरी त्या विकील्या।
किती सुंदरा हाल होवोनि मेल्या।।९।।
किती कोकणामाजी ते लोक गेले।
फळें काकड्या भक्षिता रोग जालें।
पिडा पावले पोट फुगोनि मेले।
किती किर्र म्हणोनि फिरोनी मेले।।१०।।